టయోటో ఇన్నోవా 2026 మోడల్ వచ్చేసింది... ఓ లుక్కేద్దామా!

ప్రముఖ ఆటోమొబైల్ సంస్థ టయోటా కిర్లోస్కర్ మోటార్, భారత మార్కెట్లోకి సరికొత్త 2026 ఇన్నోవా క్రిస్టా ఎంపీవీని విడుదల చేసింది. స్వల్ప కాస్మెటిక్, ఫీచర్ అప్‌డేట్లతో వచ్చిన ఈ కొత్త వెర్షన్ ధరలు రూ. 19.72 లక్షల నుంచి రూ. 26.63 లక్షల (ఎక్స్-షోరూమ్) వరకు ఉన్నాయి. ఇప్పటికే దేశవ్యాప్తంగా ఉన్న టయోటా డీలర్‌షిప్‌లలో బుకింగ్స్ ప్రారంభమయ్యాయి.

కొత్త ఇన్నోవా క్రిస్టాలో ముందు, వెనుక బంపర్లపై కొత్త క్రోమ్ గార్నిష్, అప్‌డేట్ చేసిన గ్రిల్ డిజైన్‌ను అందించారు. ఇంటీరియర్‌లో డ్యూయల్-టోన్ సీట్ అపోల్ట్రీ, స్టీరింగ్ వీల్, డోర్ ట్రిమ్‌లపై గ్రేస్ కాపర్ యాక్సెంట్స్ వంటి మార్పులు చేశారు. టాప్ వేరియంట్లయిన వీఎక్స్, జెడ్‌ఎక్స్‌లలో వైర్‌లెస్ ఛార్జర్, జెడ్‌ఎక్స్ ట్రిమ్‌లో టైర్-ప్రెజర్ మానిటరింగ్ సిస్టమ్ (TPMS) వంటి కొత్త ఫీచర్లను జోడించారు.

అయితే, ఇంజిన్‌లో ఎలాంటి మార్పులు చేయలేదు. పాత మోడల్‌లో ఉన్న 2.4-లీటర్ డీజిల్ ఇంజిన్‌నే కొనసాగించారు. ఇది 150 hp పవర్, 343 Nm టార్క్‌ను ఉత్పత్తి చేస్తుంది. 5-స్పీడ్ మ్యాన్యువల్ ట్రాన్స్‌మిషన్‌తో ఇది లభిస్తుంది. ఎకో, పవర్ డ్రైవ్ మోడ్‌లు కూడా యథావిధిగా ఉన్నాయి.

పాత మోడల్‌తో పోలిస్తే, కొత్త క్రిస్టా ధరలు వేరియంట్‌ను బట్టి రూ. 32,000 నుంచి రూ. 83,000 వరకు పెరిగాయి. భద్రత పరంగా ఏబీఎస్ విత్ ఈబీడీ, హిల్-స్టార్ట్ అసిస్ట్, 3 ఎయిర్‌బ్యాగ్‌లు బేస్ వేరియంట్లలో స్టాండర్డ్‌గా వస్తుండగా, హై-ఎండ్ వేరియంట్లలో 7 ఎయిర్‌బ్యాగ్‌ల వరకు ఉన్నాయి. 2016లో విడుదలైనప్పటి నుంచి ఇన్నోవా క్రిస్టా తన విశ్వసనీయత, విశాలమైన స్థలం, మన్నికతో ప్రైవేట్, ఫ్లీట్ ఆపరేటర్లలో మంచి ప్రజాదరణ పొందింది.